Odesa dekabrniñ 4-ne keçer gecesi Rusiye dronlarınıñ ücümine oğradı, dep bildirdi vilâyetniñ arbiy memuriyet yolbaşçısı Oleg Kiper. Yañı malümatqa köre, yedi insan yaralandı, hususan bir kişi hastahanede qala, digerlerine tibbiy yardım kösterildi.
"Ava mudafaasınıñ bölükleri ava nişanlarınıñ büyük qısmını yoq etti, lâkin vatandaş ve energetika infrastrukturası zarar kördi. Parçalarnıñ tüşmesi ve patlav dalğası neticesinde yedi çoq daireli evniñ ve memuriy binanıñ, yengil maşinalarnıñ camları qırıldı", – dep qayd etti memur.
Onıñ aytqanına köre, qurtarıcılar yanğınnı söndürdi, zarar körgen evlerniñ sakinleri içün akimiyet mahsus noqtalar açtı.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastruktursına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini ayta.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.